Internaciona Ido-renkontro 2001 en Nürnberg / Germania
Inter la 17ma e la 21ma
di junio 2001
en mea hemurbo Nürnberg eventis
internaciona Ido-renkontro kun partoprenanti ek kin landi.
Pro diversa kauzi ca renkontro esis l’unesma internaciona Ido-kunveno depos nia
internaciona
Ido-renkontro 1998 en Polonia .
La partoprenanti arivis
de la 16ma til la 18ma di junio.
|
|
|
La
partoprenanti de sinistre a dextre : Hans Stuifbergen (Nederlando) Brad Philpot (Nederlando) Günter
Anton (Germania) Wolfgang
Quies (Germania) Zmitro
Lapcionak (Belarusia) Jean
Martignon (Francia) Alfred
Neussner ( Wanda
Yakovenko (Polonia) Vlado
Yakovenko (Polonia) Frank
Kasper (Germania) Marion
Kasper (Germania) Heidi
Neussner (Germania) Eberhard
Scholz ( Ne videbla
ye la foto: Manfred
Magin (Germania) |
Kun grandega plezuro me salutis ye la vespero dil
16ma di junio 2001 Idisti ek tri landi en Nürnberg.
Me kordialege bonvenigis en Nürnberg Jean Martignon de Francia, Hans
Stuifbergen e Brad Philpot de Nederlando.
Ja kelka minuti pos lia arivo en la hoteleto ni l'unesma foyo renkontris por
experiencar l'unesma agreabla Ido-rondo en Nürnberg.
Pos ke ni komencis nia babilado tote en Ido la hotelestro questionis, quala
linguo ni parolas. Tale ni havis l'unesma okaziono mencionar nia komuna linguo
en la
hoteleto.
Pos kurta restado en la restorerio di la hoteleto ni iris ad altra tradicionala
Frankoniala restorerio por durar nia agreabla babilado e manjar, nam esis la
tempo
por la dineo. La manjaji esis tre saporoza por mea gasti e me e la servisto e samtempa chefo
dil restorerio esis tre kontenta pri nia restado che lu ed adiis ni
omnu persone e dankis por nia vizito.
Pose ni kelke migradis alonge la urbala muro e fine
ankore sidis dum kelka tempo en la restorerio dil konfereyo.
Omnakaze me
ja dum l’unesma vespero esis tote entuziasmigata dal unesma renkontro
kun idisti depos longa tempo.
Quankam ni venis ek diversa landi unu komprenis l'altru sen problemo pro l'uzado di komuna linguo, nome Ido.
Frank Kasper
Preske omna altra gasti arivis la17ma junio en Nürnberg. Ni vidis unesmafoye nia
samideani Zmitro di Belarusia e le Yakovenko di Polonia. Ni omna
bone interkomprenis en Ido qua esas nia unika posibla
komunikilo. Ni promenis tra la bela anciena urbo
Nürnberg, sub tre chanjema vetero.
Nia amiko Hans Stuifbergen ne esis kun ni, nam il
vizitis l’ urbo Bamberg, qua havas
reputeso esar tre bel anciena urbo.
Jean Martignon
Fine ni nun esis 14 gesamideani ek quar landi.
Nia renkontro komencis dum la matino dil 18ma di junio kun veho per la specala
treneto tra la belega anciena urbo di Nürnberg.
Pose ni promenis a la kastelo di Nürnberg e de ibe a
la centro dil urbo, ube ni dejunis.
Dum la posdimezo komencis nia
diskuti. Antee ankore jurnalisto di la regionala jurnalo "Nürnberger
Nachrichten" vizitis nia rondo ed interviuvis la prezidanto e
viceprezidanto dil ULI e me kom organizero dil renkontro. Lu tre interesis audar
pri Ido e fotografisto facis kelka fotografuri di nia rondo.
Artiklo pri nia renkontro fine aparis dum saturdio la 24ma di
junio en la jurnalo “Nürnberger Nachrichten”.
Ni diskutis pri
diversa Ido-aferi, exemple pri nia revui e pri to, quale ni agos por atingar la ISO-kodo "io"por Ido.
Cetere nia ULI-prezidanto Günter Anton klarigis la laboro dil Linguala
Komisitaro dil ULI e quale on ibe povas aktive partoprenar.
|
|
La Negermana samideani uzis l'okaziono por asistar la paralele a la programo
dil Ido-renkontro eventita renkontro dil Esperanto-Grupo Nürnberg ed ibe
prezentar Ido kom alternativo ad Esperanto.
Samtempe en l' Ido-renkontreyo
eventis kunveno di la Germana Ido-Societo.
Fine ni ye 22.00 kloko segun loka tempo en Nürnberg eniris a l'Ido-babileyo e
dum preske un horo diskutis ibe kun kelka samideani.
Ni experiencis vere multo dum
l'unesma dio di nia renkontro.
Frank Kasper
Matine la 19ma di junio esis ped-exkurso tra l’urbo. Ye la 12:00
ni vartis e sucesis observar la Irado di Viri en kirko de Santa Maria. En la supra parto dil kirko
apertesis du pordeti e 7 apostoli trifoye rondiris cirkum rejo.
|
|
Posdimeze esis kunsido dil partoprenanti.
Ni diskutis dum la kunsido pri interneto (pri uzo e utileso de interneto por
difuzar la linguo en interneto e ganor nova
interesati), Frank raportis pri nova posiblesi rezervar adreso www.ido.info por la ULI to es
tre bona, ke ni havez tala kurta adreso
por homi povez facile memorigar
ol e anke til nun ne esis adreso qua havas nur la vorto IDO, ma esis idolinguo. Esis komento ke nia
elektrona grupi esas
bona afero, ma esus anke plu bona,
se ni havus plu
interesiva temi por diskutar e ke eventez vera aktiva diskuti ne nur quereli pri lingual problemi.
Vespere ni vizitis famoza restorerio. Esis multega repasti, kun nomi ne komprenebla por
me, ma tre saporanta - to es ne nur mea opiniono, omni dicis
to. Ante, dum e pos la manjo ni multe babilis pri diversa temi. To esis tre agreabla
vespero en intima,
amikala maniero. Ni ne volis livar la loko
e kelka decidis restar hike por nokto - quo certe ne esis exekutita. Dum parto di homi
pardrinkis plura
bier-glasi altri iris por poke promenar.
Ni interkonsentis
renkontror apud la hotelo. Kande la
lasta grupo livisis la restorerio ed arivis ye la hotelo, la antea grupo ne
esis videbla.
Ni venis serchar li en la quartelo di Reda lumi. Esis multa joki ed omni restis kun la
maxim plezanta impreso pos la vespero.
Zmitro
Matine dil 20ma di junio esis la lasta komuna
kunsido dum nia renkontro en Nürnberg.
Komence ni diskutis pri la futuro di Ido-movado.
= Nia maxim importanta skopo esas - ganar nova membri.
To povas esar facata per interneto e per anunci en diversa naciona revui, jurnali ec.
= Esas konocata generala (ne nur en Ido-movado) tendencco, ke homi ordinare ne volas membreskar ye ula
organizuro, nur
partoprenar la movado. Malgre
to, plusa membri dil ULI es necesata.
= Ido es defenso di mikra lingui. Ya l´angla ja exekutas la rolo di inter-linguo, ed es vaste difuzita.
Ma ol adportas anke la angla (usona)
kulturo, penso-maniero.
Tamen Ido portos neutrala inter-kulturo. Ico povas uzesar en propagili, reklamili.
= Malgre to ke ja existas unikodo - posibleso uzar en komputoro multega, preske omna literi e signi
ek omna lingui, ica posibleso ne es
facila e quik uzebla da omnu.
pro to Ido-linguo havas granda avantajo kompare ad Esperanto e multa nacionala
lingui, qui havas literi apud la latina alfabeto.
= Ni parolis pri posibleso uzor artefacita linguo kom ponto dum traduko inter altra lingui e dum
kontakti inter homo e komputoro. Ido es
tre (plu) apta por ica skopo
esante tre preciza.
= Ankorafoye esis atencita, ke ni - Idisti ne disipez tempo por sensenca diskuti. La tota energio,
forto mustas uzesar por la movado, por
avancigado dil
linguo. Tre importanta tasko esas kreadar literaturo.
L´inklino a reformo-diskuti esas indikilo pri to ke la homo esas nova a la linguo, ne bone konocas
ol ne tote posedas omna posiblesi
di ol. Qua bone
savas la linguo, komprenas apteso e suficeso di ol en nuna formo. Qua lektis la historio di Ido,
savas,
qua eminenta ciencisti kreadis la linguo.
Nun la chanco, ke ul propozo pri chanjo (gramatikal) esos aceptita, esas tre mikra. Posiblesas nur
oficialigo di nova vorti. La voyo por lo ja esas skribita. On
mustas esar membro di ULI, la propozo sendesas a lingual komitato, qua konsideras ol per
diskuti.
Pose la direktanta komitato decidas pri aceptor ol, o ne.
= La listo di nova vorti mustas publikesar en ul revuo, jurnalo ec.
Dum la recenta tempo aparis multega vorti, qui ankore ne existas
en Ido (komputorala, financala,
politikala ec). To
esas granda tasko por linguala
komitato. Anke necesesas kunlaboranti ek diversa landi kun bona savo en koncernata cienco.
En la prezenta listo di nova vorti esas multa
ciencal nocioni, ma ofte ne esas ti por omnadiala uzo, qui esas plu importanta por la linguo.
Krear nova vorti ne
signifikas sempre krear nova radiki. On
povas facar kombinuri od donar ad existanta
vorti nova senco.
Diskuto pri Ido-flago
On venis a konkluzo, ke es necesanta havar
flago, ed uzor ol dum renkontri, precipue en publika loki. Alfred sendos un exemplero a
Frank, qua facos komputoral modelo. Pose on povos imprimar la desegnuro
e produktar papera flageto.
Esas tre bona ideo havar e vestar T-kamizi
kun menciono pri Ido, propoganda-skope.
Pri insigni. Semblas, ke nun insigni ne es tre populara, ma ni ne devas
obliviar anke ica moyeno demonstrar nia
linguo. Necesesas
questionar la Britana Ido-societo pri ka la societo havas insigni (es menciono
en la listo di vendata libri), ka la
insigni esas ri-produktebla.
Pri Ido-renkontro en nexta yaro
Frank propozis organizor ol ankorafoye en Germania.La lando es tre bone acesebla por multa homi, do, existas plu granda kauzo
por Idisti elektor ol. En Grossbothen (apud
Leipzig) eventos kongreso honore a
W. Ostwald nobel-laureto pri kemio, ma
ante omno anke pioniro e kunkreanto di Ido. Idisti ne darfas ignorar
ico. La evento esos
esos dum junio o julio. Ma
dum la kongreso ul
reprezentanto di Ido anke mustas partoprenar.
Frank vizitos la urbeto,
exploros diversa varianti e propozos bela programo. Ultre la dat-reveno di Ostwald, anke la turistala questiono
mustas
konsideresar.
Fine di la lasta oficiala kunsido ni kompilis adresaro dil
partoprenanti, qua forsan
esos publikigita, pozita en interneto kun
kurta (o plu granda) noti, memoraji pri
la renkontro.
Regretinde la tempo dil renkontro tre rapide pasis e multa amiki foriris adheme,
kun espero pri plu rapida nexta renkontro.
Dum la dimezo la maxim multa partoprenanti
departis.
La restinta gesamideani ankorfoye promenis tra la urbo
e dum la vespero vizitis la Germana Nacionala Muzeo kun la Strado dil Yuri
Homala. L’eniro a la muzeo
merkurdie vespere esas gratuita.
Zmitro
La oficial programo esis finita. La 22ma di junio esis neoficial renkontro. En Nürnberg
restis quar idisti
Frank, Marion, Jean e me.
En frua matino ni renkontris apud la hotelo
ed iris a la staciono, de ube ni komune vehis per lenta treno a München. Jus pos arivir a
la chef-urbo di Bavaria
ni dejunis en Thai-China restorerio (tale esis skribita). Sonis
indiana e turka muziko, la manjo esis tre spicoza - ne
singlu povus par-manjar omno.
Pose ni vizitis multa vidinda loki: katedralo di St. Mikolao, Kirko di mulieri (tre
alta, ni iris
per longa spiralo, pose prenis lifto), en
qua turmo supre (ye alteso di 86m) ni lasis
noto, ke la urbon vizitis Idisti ek multa landi
dum la renkontro en Nürnberg, e tre prizis
München.
Ni trinkis teo en restorerio
sub fresha areo. Pedpromenis a gardeno
de bestii, preter pekuni-gardeno (nula pekunio videblis :-( E venis en granda parko, en qua
vidis China te-dometo (klozita tamen),
klimis sur monteto supre di qua es grekatra templo kun nomo "Monopteros".
Pos nelonga promeno ni arivis a
bier-gardenego apud Chinaturmo. Hike
esis multega homi. Frank tandem trovis
biero (nigra, 1 litro), ni fotografis
lu. Pos la gardeno ni venis a central
strado
di München,
iris ad Universitato ed a bier-gardeno,
qua esis reparata, do ni sidis en apuda alternativa loko.
Me unesmafoye manjis O'batzta (Obatzda) - bavara specialajo - ne belarusa, me memoros
la nomo por pluse ne manjor ;-)
Kande ni eniris en la treno a Nürnberg esis
nur tre poka libera loki por sidar. Ma ni interbabilis e forsan la nekonocata e
nekomprenata
linguo fugigis omna altra pasajeri.
Zmitro
Fine esas konstatebla, ke omna partoprenanti
experiencis agreablega ed amikala renkontro e retrovenis heme kun la maxim bona
memoraji .
Me kordialege dankas a Zmitro Lapcionak ed Jean
Martignon pro lia kontributi a ca raporto.
Frank Kasper
Ica raporto finas kun la sequanta dank-vorti ed
impresi da kelka partoprenanti:
“Kara samideani,
Hike me devas expresar mea gratitudo a nia amiko Frank Kasper qua tre ecelante
organizis la internaciona Ido-renkontro di Nürnberg. Nia samideano
organizis omno bone ed esis atencema pri la bezoni di lua
gasti. Il guidis ni tote bone tra la bel urbo Nürnberg
quan me tre prizis. Por
la lasta restanti
il mem vizitigis la chefurbo di Bavaria nome
München (ube me ne havis la impreso esar en Germania). La Michaeliskirche (kirko
di santa Mikael)
en München esis vera splendidajo dil baroko-tempo).
En Nürnberg turmi, kirki, edifici dil Mezepoko e Renesanco (e la fonteno dil
Megero) esas ne nur tre bela ma vera turismala atraktaji qui devus venigar
turisti di la tota mondo. Nur la klimato "laesst zu wünschen übrig" (ne esas quale onu povus dezirar), nam pluvis e frostis dum
la unesma dii, ma
pose ni havis tre bela sunoza vetero.
Me aparte prizis la "lebkuchen"-i qui esas
tre saporoza kuketi dolce spicizita. Por ganar pekunio ed
impulsar nia movado Frank devus divenor
"lebkuchen"-i-exportacisto, il certe povus divenor richa e mem
richega.
Me anke tre prizis la vizito dil quartero di la
"reda lanterni", nam tala quarteri ne existas en Francia.
Se me uladie devus
translojar a Germania, me certe dezirus divenigar Nürnberg kom mea hemurbo.
Gratulo Frank !
Kordiala saluti.
Jean Martignon
“
„Kar amiki!
Pos la Ido-renkontro en Nürnberg ni
voluntas kordiale dankar a Frank Kasper ed omna amiki, qui organizis ica
ecelanta renkontro e helpis a ni partoprenar en ol.
Tre agreabla ed utila tempo travivis ni en
Germania. Quankam vetero ne sempre esis bona, ma ni
memoras pluvo e kolda vento(qui aparis de tempo a tempo) kom negrava e qui
quaze okazionis. En nia memoro restas tre varma amikala relati e
bonega tempo pasinta kun ja konocata e nova amiki.
Kordiale salutante
Wanda e Vlado “
”Kara samideani!
Quale
on dicas: nia renkontro en Nürnberg esas ja la historio. Dank a vua helpo me povis unesmafoye
dum vivo vizitar vua bela lando e lernar ne nur Ido. Me retrovenis a Polonia
kun nova forti por propagar nia linguo inter homi. Regretinde me ne savas la
linguo sufice bone por kurajoze diskutir dum nia kunsidi. Pro to me
decidis skribar kelka opinioni.
Yes
me konsentas - la interreto es la chanco anke por Ido. On devas irar ca-voye. Tamen esas anke homi, a
qua es plu facile proximesar per simpla varma vorti ed uzar tradicionala
moyeni di la lernado e propagado. Me pensas ke ni bezonas omna singla samideano.
Forsan ke nome lu forte agos por Ido.
Segun
me ultre la lexiki e lernolibri komencanti bezonas
helpili por bona pronunco di la linguo.
Utileso
di nemediata kontakti inter Idisti esas segun me
nemezurebla. Pro to me opinionas ke ultre renkontri
internaciona esus tre utila anke lokala(landala, urbala), partikulare por
samideani, qui ne povas vehar exterlande.
Ni
havez Ido ne nur por nia plezuro, ni dividez ol kun altra homi!
Amikala
saluti
Wanda
Jakowenko”
“Kara Wanda,
Quala surprizo! Me tre
joyas lektar mesajo de vu che Idolisto (ed Idostab, di qua me
anke es membro). Anke me havas varma memoraji pri la
renkontro en Germania ed anke pri renkontrar vu, ibe. Me
rimemoras parolar kun vu, en tre
bona Ido, sen dubito.
Vu es justa, kunvenar lokale, regionale, landale, es tre bona stimulo tam por
pronunco e kam por aktiveso. Ta-relate ni sequez la Germana Idisti,
qui povas
renkontrar pro lia relative granda nombro. Ma anke freque renkontras l' Angla Idisti. Me kredas ke en Kanada l' Idisti renkontras
de tempo a
tempo, ed anke en Francia. En Nederlando anke esas kelka
Idisti, Nederlando es sat mikra por interrenkontrar. Tale Brad e me
renkontras singla-merkurdie en la centro dil urbo, ube ni parolas Ide, ed ofte
anke altri partoprenas. Parolar Ide es bona moyeno por lernar.
Me havas adresi di Polona Idisti, forsan ke
vu e Vlado povas aranjar yarala (o forsan plu frequa) renkontro dil Idisti
Polona.
On povus anuncar la
landala o regionala renkontri en jurnali o periodala revui.
Vu es justa, Ido es por nia omni.
Saluti amikala,
Hans Stuifbergen”
Kande ni Idisti konferis en l’ urbo Nürnberg, un di la maxim importante
loki por la Germana historio, ni ne nur diskutis pri linguala e organizala
problemi.
Ni anke vizitis bela loki. La chefurbi di la germana regiono Frankonia anke
havas speciala manjajo – la sociseti “Nürnberger Bratwürste”.
On drinkas diferenta sorti di biro, nigra, blanka,
reda e fumoza biro. Ma se on volas probar omna sorto ibe on mustas esar drinkinta dum
un semano.
Me nur probis specala sorti en diversa belega bireyi. Ma
se vi volabus savar pluse pri la saporo di biro, lore questionez nia
reprezentanto
di la Germana Ido-Societo.
Ante ke on volas drinkar la biro on mustas produktar lo.
Existas mikra braserio, ube on brasas la biro olimemaniere. Li nur uzas
malto di lupulo, hefo, hordeo e aquo. On donas li en granda kuvo.
Ek aquo e malto on koquas la maisho. La futurala biro mustas esar
varmigita.
On koquas l’ hordeo, donas ol ad en la biro, adjuntas la hefo e vartas. La
biro fermentacas. Pos la fermentaco on nur mustas havar bela boteli,
endonar la biro e konservar ol en la kaverno.
Olime on bezonis kaverno ube on povas retenar konstanta temperaturo di 6
°C. Lore la homi spadagis kavi sub sua domi. Irgatempe
on
renkontras la vicino – komune on durigis la kavernigado.
Talemaniere on konstruktis systemo di galerii e
kaverni. Cadie on povas
vizitar li.
Per acensilo on transportis la biro adinfre. Aden kaverni on jetis glacio
por retenar la necesa temperaturo dum somero.
Me ankore trovis kaverno kun biro. Ol esis aperta. Ma kande me ed un yuna
Japonianino volis aceptar la invito drinkar la ibea biro la duktanto
di mea exkurso explikis: La biro esis exterordiara specialajo. La braserio kreis mixturo inter biro e
champanio. Nun li volis vendar lo nomizante
“Champanio-biro”. Li ne darfas agar lo. Li ne darfas nun uzar la nomo champanio od sika vino.
Li ankore ne esas permisata ofrar la biro sen nomo
gratuite. Nun la belega biro konservesas en ica kaverno. Ol
nur esas drinkebla til septembro cayare.
Esas shamo savar, kelka juvelo konservesas sub Nürnberg ed
nulu darfas havar lo.
Idisti,
unionez, voyajez a Nürnberg, enirez la kaverno sub la
bireyo Altstadthof ed evakuez la boteli.
Ye via saneso!
Marion Kasper
Ica
pagino esas publikita da
Frank
Kasper
Postfach 73 01 28
DE-90243 Nürnberg
Germania
Telefono: +499119904930
Faxo: +49721151346637
Hike vu trovas plusa
informi pri Ido
Retro a la
komenco di ca pagino